WRTH FY MODD

Sara Davies, Maura Hazelden, Maria Sears and Rosalind Sharples

Dydd Llun 13 Rhagfyr 2004 - Dydd Iau 6 Ionawr 2005

Rosalind Sharples

Datganiad yr Artist :
Mae’r sioe hon yn cyfuno gwahanol themâu sydd hefyd yn dwyn cyswllt â’i gilydd ac sy’n rhan o’r cysyniad cyffredinol o deithio. Rwy’n mwynhau cerdded drwy gefn gwlad yr ardal hon, ac yn teimlo, fel y rhan fwyaf o bobl, fod hyn yn rhoi cyfle da i mi fyfyrio. Mae’r daith yn troi’n llwybr drwy’r meddwl yn ogystal â thrwy’r dirwedd. Am hynny, mae geiriau cerddi i’w gweld o gwmpas ymyl nifer o’r darluniau. Nid yw’r geiriau a’r delweddau yn darlunio’i gilydd, cydgyswllt yn unig sy’n eu dwyn ynghyd. Maent yn ychwanegu at ei gilydd yn hytrach nag yn rhoi gorchmynion i’w gilydd.

Mae rhai o’r darluniau yn fwy llythrennol na’i gilydd. Mae pob un ohonynt yn deillio o arsyllu ar dirweddau lleol, ond mae rhai yn cynrychioli un foment mewn amser tra bo’r lleill yn cynrychioli profiad mwy cyfansawdd o gerdded drwy dir, môr ac awyr.

Felly, gydag un eithriad, mae’r sioe yn archwilio teithiau drwy’r bydoedd mewnol ac allanol rydym ni’n byw ynddynt, y rhyngweithio rhwng yr elfennau a sut y mae’r rheiny yn cyfuno yn ein meddyliau wrth i ni gerdded gan lunio patrymau o argraffiadau ac atgofion. Yr unig eithriad yw’r ddelwedd o fam a phlentyn (Dawel Nos, Sanctaidd Nos). Rwyf wedi cynnwys y darlun hwn oherwydd dyma bartner y ddelwedd sy’n darlunio’r cwpl ar y ffordd (Gwisgai Joseff ‘Sgidiau Glaw Gwyrdd). Rhain yw fy mhaentiadau Nadolig ond yn fy stori Nadolig rwy’n dathlu sancteiddrwydd taith y naill gwpl a’r llall drwy eu tirwedd gyfarwydd eu hunain; a phrofiad pob mam wrth iddi garu ei phlentyn. Mae hon yn thema barhaus yn fy ngwaith, sef dathlu’r cysegredig yn ein bywydau cyffredin.

Ceir arddangosfa o’m gwaith hefyd mewn Sioe Nadolig yng Nghanolfan y Celfyddydau, Abergwaun. Mae’r gwaith sydd yno yn cydymdeimlo â’r themâu sy’n cael eu harchwilio yn yr arddangosfa hon.

Sara Davies

Datganiad yr Artist:
Cefais fy ngeni yn Sir Benfro, a dychwelais i Dyddewi bedair blynedd yn ôl ac yno rwy’n byw ac yn gweithio bellach.

Y traethau lleol sy’n amgylchynu penrhyn Sir Benfro fu’n gyfrwng i ysbrydoli’r lluniadau hyn. Defnyddiais bastel meddal fel fy mhrif gyfrwng ar gyfer y morluniau er mwyn ail-greu symudiad cynnil a thryleuedd y dwr. Mae gwead melfedaidd y pastelau yn eu gwneud yn ddelfrydol i’w cyfuno er mwyn creu dyfnder a llewych lliwiau cyfnewidiol y môr ac er mwyn ceisio dal yr elfennau naturiol - gwawl a gwynt - ar wyneb y lli.

Maria Sears

Artist's Statement
My drawings are entwined with my words, my thoughts, my music, my plants, my delight.

I have been working as an artist for many years. I am unsure about categorizing myself in metal, but recently I find drawing and painting express my ideas well.

I like to work unchecked, so as not to begin with a fixed image. This work springs from me. I am fascinated by unexpected events and meetings and how they come to add so much to our lives. Even in our apparent bleakness. It is a playful place.

Maria Sears

Datganiad yr Artist
Mae fy lluniadau wedi’u cordeddu gyda’m geiriau, fy meddyliau, fy ngherddoriaeth, fy mhlanhigion, fy hyfrydwch.

Bûm yn gweithio fel artist ers nifer o flynyddoedd. Rwyf yn ansicr ynglyn â chategoreiddio fy hunan mewn metal, ond yn ddiweddar rwy’n teimlo fod lluniadu a phaentio’n cyfleu fy syniadau’n dda.

Rwy’n hoffi gweithio’n ddirwystr, fel na fyddaf yn dechrau gyda delwedd benodol. Mae’r gwaith hwn yn deillio ohonof i. Rwy’n cael fy swyno gan ddigwyddiadau a chyfarfodydd annisgwyl a sut y mae pethau o’r fath yn ychwanegu gymaint at ein bywydau. Hyd yn oed yn ein llymdra ymddangosiadol, mae hwn yn lle chwareus.

Maura Hazelden

Gair Am Fy Ngwaith
Mae’n well gen i beidio defnyddio geiriau i roi esboniad rhy uniongyrchol ar fy ngwaith am fod hwnnw, wedi’r cwbl, yn weledol ac yn gweithio mewn dull mwy haniaethol nag iaith gan mwyaf. Ond efallai ei fod yn fuddiol sôn am rai o’r mannau cychwyn yng nghyswllt fy ngwaith. Mae’n wir bod gennyf ‘ddatganiad artist’ ond mae hwnnw, efallai, braidd yn haniaethol ac yn fwy atgofus nag esboniadol!

Bu atgof a dirnadaeth yn y cartref/tirwedd, rheolaeth a threfn (a’r hyn a drosgyfeiriwyd), teithio, cnawdolrwydd mewn pethau bob dydd a’r benywaidd yn brif themâu yn fy ngwaith ers rhai blynyddoedd. Mae’r arddangosfa hon yn dangos dwy elfen o’m gwaith na fyddaf yn eu harddangos gyda’i gilydd yn aml iawn: tirlun a’r cartref. Yn y lluniau tirwedd rwy’n edrych ar lecyn y bûm yn ymweld ag e’n rheolaidd hyd nes i fi gyrraedd naw oed. Ers hynny, mae wedi llanw fy nghof a’m breuddwydion. Dychwelais yno ym mis Medi 2003. Roeddwn yn awyddus i wybod pa mor dda roeddwn i’n ei gofio a beth oedd arwyddocâd y lle i fi. Fel yn achos breuddwydion, does dim modd hoelio’r cof; rhaid caniatáu iddo grwydro er mwyn iddo gyflawni ei swyddogaeth. Weithiau bydd bylchau enfawr yn y cof; bydd yr atgof am un peth yn eglur, tra bydd rhywbeth sy’n eistedd wrth ei ymyl yn angof. Pa faint o’n cof sy’n eiddo i ni? Fyddwn ni’n ychwanegu rhyw bethau wrth i ni glywed sôn gan eraill, am ddigwyddiad yn ystod cyfnod plentyndod, dyweder, ac yn defnyddio ffotograffau i ychwanegu at yr atgof, yna tybio bod y pecyn cyfan yn deillio o’r profiad gwreiddiol? Yna, dyna i chi hiraeth, sydd, rwy’n tybied, yn aml yn gof diffygiol, ac yn un detholus iawn, yn ddi-os; yn aml yn dwyn i gof arogleuon, gweadau, fflachiadau o atgofion wrth edrych ar wrthrych neu ddelwedd o’r gorffennol. Mae’n ymddangos fel atgof dychmygus o fywyd fel ein teidiau a’n neiniau, o’r cyfnod y cawsom ein geni iddo ond na fu i ni erioed ei brofi.

Byddaf yn defnyddio pa bynnag gyfrwng sydd fwyaf priodol yn fy marn i er mwyn archwilio fy syniadau (ffotoweledol, perfformiad/celfyddyd byw, paentiad, collage, tecstilau). Byddaf yn llenwi nodiadur gydag ysgrifen a lluniadau. Rwy’n defnyddio’r camera. Mae gennyf ddiddordeb mewn ffotograffiaeth fel cyfrwng gan fod hon yn aml yn ffordd o gael cipolwg ar ein hatgofion; ydyn ni’n cofio’r fan neu’r ffotograff o’r lle arbennig hwnnw? Ydyn ni’n cofio amser a’r hyn sydd i’w weld o boptu’r ffotograff? Mae ffotograffau’n ymddangos mor gyfarwydd a dibynadwy. Ac rwy’n mwynhau’r broses ffotograffig: y golau er mwyn creu’r ddelwedd, y graen, argraffu a thrin a thrafod y papur. Byddaf yn ail-dynnu ac yn ail-dynnu’r ffotograffau eu hunain.

Mae’r broses wybyddol o ddosbarthu yn creu trefn a diffiniad. Wedi hynny, mae’n symud ymlaen at reoli a defodoli.

Trefn ddomestig y cof
Yr atgof am drefn ddomestig
Trefn y cof domestig

1 trosgyfeirio
ffrwyno
rheoli
darostwng
mygu
tawelwch

disylwedd

2 trefn
trefnu
llunio
trefnu
dosbarthu
twtio
cynnwys

3 diflanedig
darfodedig
dros dro
byrhoedlog
gwibiog
anghyffwrddadwy

dychmygol

4 rhoi ffurfiad trefnus, cyfundrefnu. Rhoi trefn ar faterion (person arall), gwneud trefniadau ar gyfer (person), trefnu neu hyfforddi, darparu, bod yn gyfrifol am. Y cyflwr hwnnw lle y bydd pob rhan, uned ac ati yn ei lle priodol; taclusrwydd, trefn benodol, olyniaeth.

Amserau Agor yr Oriel
10yb - 8yh Dydd Llun - Dydd Sul

Arddangosfeydd y Gorffennol a'r Dyfodol | Arddangosfeydd Presennol | Polisi y Celfyddydau Gweledol | Gyfarwyddiadaus