Glenn Ibbitson - Oriel Isaf

Mwg a Drychau
Ddyd Llun 29 Awst - Dydd Mercher 21 Medi 2005

Glenn Ibbitson

Y ffurf ddynol yw thema ganolog fy nghelfwaith; nid lluniad neu siâp delfrydol, glanweithedig y dyn neu’r wraig enwog, ond y corff a’i fyrdd o ddiffygion, ei anghymesuredd a’i anghysondebau, sy’n amodol ar y broses ddidostur honno, sef heneiddio. Er mwyn ehangu cwmpas y diddordeb hirdymor hwn, mae’r darluniau hyn yn ffurfio cefndir i’r Syrcas ac yn eu plith ceir:

1 ‘Cywreinbethau’r Bod Dynol’
Darlunnir y rhain fel tablo sioe eilradd ac maent yn dathlu’r amrywiad o’r canolig (neu’r delfrydol sy’n ffasiynol ar hyn o bryd) mewn perthynas â’r ffisioleg ddynol, sydd dan fygythiad mewn cymdeithas sy’n meddu ar y gallu technolegol i weithredu dethol (an)naturiol, a

2 ‘Perfformwyr’
twmblwyr, swynwyr a’u cynorthwywyr. Gwelir pobl gyffredin yr olwg yn perfformio campau hynod; cyferbynnir gallu corfforol a thymhorol gyda deheurwydd y dwylo; act unigol sy’n arddangos medrusrwydd (saethyddiaeth twyll-gamp) gyda’r rhith sy’n cael ei chreu drwy gyd-gynllwynwyr a gwaith tîm (Y Bont Ddynol a’r Wraig sy’n Ymgodi).

Nid cyfres o baentiadau sy’n darlunio sglein perfformiad gorffenedig dan oleuadau yw hon; mae’n aros gyda’r prif gymeriadau wrth iddynt ymarfer; mae eu gwaith yn mynd yn ei flaen. Hyd yma, nid yw’r cymeriadau yn eu gwisgoedd llwyfan ac mae’r sesiynau ymarfer yn digwydd mewn llennyrch yn y goedwig neu o flaen cefnlenni theatrig sydd eto heb eu hagor a’u hymestyn i’r eithaf.

Defnyddiais fy mhrofiad o dwyll gweledol fel artist golygfaol yn y diwydiant ffilm a theledu i archwilio natur effeithiau trompe-l'oeil a (cham)bortreadau. Cyfeirir yma at dechnegau sinematig cyfarwydd (cefn-daflunio, torluniau, saethiadau drwy wydr, prostheteg) er mwyn rhoi i’r darnau hyn ymdeimlad o anghytgord gweledol, a chynhyrchir delweddau sydd, mewn un ffordd neu’i gilydd, yn herio syniadau derbyniol am yr ymdeimlad o ddisgyrchiant, graddfa a ffisioleg. Caiff syniadau a rhagdybiaethau’r gynulleidfa eu hecsbloetio gan dwyll neu ystryw weledol er mwyn pylu’r llinell rhwng y dilys a’r twyllodrus, realiti a lledrith.

Hefyd yn arddangos yn Oriel Mwldan Uchaf - Rosie Simpson - Paentiadau

Amserau Agor yr Oriel
10yb - 8yh Dydd Llun - Dydd Sul

Arddangosfeydd y Gorffennol a'r Dyfodol | Arddangosfeydd Presennol | Polisi y Celfyddydau Gweledol | Gyfarwyddiadaus