Christine Benson
Yr Edau Esblygiadol
Dydd Llun 16 Hydref – Dydd Mercher 22 Tachwedd 2006
Mae teitl yr arddangosfa hon, yn fy marn i, yn
ddisgrifiad teg o’r hyn rwyf i a’m myfyrwyr yn ei
wneud. Fy nod yw tywys myfyrwyr unigol ar eu taith bersonol drwy
brofiad dysgu agored, hyblyg a chreadigol a fydd yn datblygu eu
harddull unigolyddol. Bydd y myfyrwyr yn rhoi eu cysyniad ar waith
drwy archwilio cynlluniau a samplo’n arbrofol er mwyn creu
gweithiau celf gorffenedig.
Canlyniad hyn oll yw nad yw gwaith unrhyw ddau fyfyriwr yn debyg.
Bydd y gwaith arddangos hwn mor amrywiol â’r unigolion
eu hunain a cheir yma ddewis helaeth o destunau, ac yn eu plith
fytholeg, tirluniau a ffasiwn. Ein defnydd cyffredin o edau a
thema or-redol, sy’n ddim mwy na grym y pwyth, yw’r
ddolen gyswllt sydd rhyngom. Bydd y mwyafrif yn gweithio mewn
ffordd gyfoes, ond mae yna le o hyd i waith cwbl draddodiadol.
I’r rhai hynny ohonom sy’n dal i weithio yn y dull
hwnnw, mae’n bwysig bod y gwaith yn cael ei werthfawrogi
ochr yn ochr â thecstilau archwiliadol - yn wir, mae’n
pwysleisio’r Edau Esblygiadol.
Datganiad Personol
"Mae fy ngwaith yn deillio o’m mewn; rhaid bod cyswllt
emosiynol rhyngof ag unrhyw destun cyn y gallaf ddechrau ar ddarn
o waith.
Daw fy ysbrydoliaeth o’r canlynol: ennyd amser, digwyddiad,
cerddoriaeth, geiriau, tirlun neu bensaernïaeth, a’r
môr bob tro - mae’n gysonyn yn f’achos i. Fel
arfer, ceir cyfuniad o nifer o’r uchod. Mae cerddoriaeth
yn pennu’r rhythm neu’r harmoni, weithiau defnyddir
symbolaeth mewn delwedd neu liw, nad yw’n amlwg i’r
gwyliwr bob tro - mae’n bwysig caniatáu lle iddynt
edrych ar neu ddarllen fy ngwaith fel y mynnant.
Bydd y defnyddiau a ddefnyddir gennyf yn adlewyrchu’r emosiynau
– sensitif, weithiau’n eithaf bregus – ynghyd
â’r lliwiau bob tro, a’m dull o’u defnyddio.
Bydd haenau o ffabrig, ffibrau ac edeifion - a’r rhan fwyaf
ohonynt yn sidanau wedi’u llifo â llaw - hefyd yn
cael eu gweithio mor ddwys fel bod y pwyth yn dod yn rhan annatod
o’r ffabrig cyfan. Rheswm symbolaidd sydd dros hwn hefyd
- mae’r “defnyddiau” unigol yn denau, ansylweddol,
ond o’u gweithio gyda’i gilydd, fel y byddaf i’n
gwneud, mae yma gadernid sy’n eu galluogi i sefyll ar eu
pennau eu hunain.
Mewn gwrthgyferbyniad, mae’r delweddau unlliw yn rhai minimal”.
Mae nifer o’r myfyrwyr hefyd yn aelodau o Urdd y Brodwyr
sy’n dathlu ei chanmlwyddiant yn 2006. (Ar adeg ysgrifennu
hwn, rwyf yn gadeirydd cangen Sir Benfro).
Rydym hefyd yn ymwybodol bod Tapestri Glaniad y Ffrancod yn symud
gam yn nes at sicrhau cartref parhaol yn Abergwaun.
Mae’r rhain i gyd yn gysylltiadau lleol pwysig a all, mewn
rhyw ffordd neu’i gilydd, wneud cyfraniad dylanwadol i’r
gwaith a wneir gan unigolion, a bydd pob un ohonynt, gobeithio,
yn tynnu sylw at y safon a’r diddordeb sy’n bod mewn
tecstilau yn y rhan hon o Gymru.
