TRI ARTISTS
SUSAN JOHN, CYNTH WEYMAN, DARREN YEADON

Dydd Llun 5 Rhagfyr 2005 - Ddyd Mercher 4 Ionawr 2006

Susan John
Datganiad Personol


Gan fy mod erioed wedi bod yn un am luniadu a phaentio, penderfynais ledu fy ngorwelion drwy ddechrau ymwneud â gwydr lliw o dan arweiniad arbenigwraig o’r enw Kate Derbyshire yng Nghanolfan Gelfyddydau Neuadd Llanofer, Caerdydd. Cyn pen dim wedi hynny, dyma fi’n darganfod y byd rhyfeddol a gwyllt hwnnw o gyfuno gwydr a theils. Fy ngobaith yw bod fy lluniau yn siarad drostynt eu hunain.

Cynth Weyman
Cyfres Metamorffosis

Mae siapau’r corff yn cael eu cyfuno gyda ffurfiau naturiol i greu ieithwedd symbolaidd, bersonol ac i ffurfio gweithiau celf ar raddfa fawr fydd yn destun trafod ar ben grisiau, staerau, uwchben soffa neu silff ben tân.

Ar y dechrau, drwy ddefnyddio siapau syml, e.e. hadau mân a ffyngau, llwyddais i ddatblygu techneg weol yn seiliedig ar intaglio strata gan ddefnyddio’r un dull ag wrth ysgythru, h.y. gweithio o’r cefn i’r blaen. Roedd paentiadau dyfrlliw yn creu’r wybodaeth angenrheidiol er mwyn llunio patrwm ac i gyfrif nifer yr haenau o ffabrig a’r lliwiau oedd eu hangen. Hefyd, roedd yn fodd i ganfod y mannau roedd angen tynnu sylw atynt drwy ddefnyddio edau frodio, mwclis a hadau.


Mae gweithio gyda ffabrigau ac edau yn fy ngalluogi i archwilio fy lluniadau er mwyn gallu cyflwyno dimensiwn arall. Yn aml iawn, byddaf yn gweithio ar thema, gan archwilio’r thema honno drwy nifer o gyfryngau a thestunau perthynol ac yn y pen draw byddaf yn creu sawl darn o waith. Lliw a delweddau symbolaidd sy’n creu’r awyrgylch neu’r naws yn y lluniau terfynol. Mae gweadau’n cynnig dimensiynau ychwanegol ac yn dod â’r delweddau o 2D i 3D. Mae yna hefyd ryw ddyfnder ffocws yn y gweithiau gorffenedig. Yn ddi-os, dylanwadwyd ar y dechneg gerfwedd weol hon gan fy mhrofiadau ym maes ffotograffiaeth ac ysgythriadau. Weithiau, byddaf yn cynnwys ffotograffau chwyddedig i greu rhith optegol. Caiff pob siâp, lliw a chyfrwng ei archwilio i’r eithaf posibl.

Mae’r themâu yn cynnwys delweddau o fyd botaneg, ffwngi, erydiad, bod yn fenyw ac yn artist dwyieithog a phrofiadau o fywyd personol sy’n berthnasol i brofiadau personol nifer o wylwyr – cydberthynas, profedigaeth, symud ymlaen ac effaith ein hamgylchoedd. Mae gennyf oes gyfan o brofiadau amrywiol i’m hysbrydoli a byddaf yn croesawu her fel modd i ymestyn fy nychymyg a’m cyfrwng. Mae’r gweithiau gweol sydd i’w gweld yn yr arddangosfa hon yn nodweddiadol o’r darnau y gellir eu comisiynu fel gweithiau trafod fydd yn cyfleu straeon personol y prynwyr. www.cynthweyman-artist.co.uk

Darren Yeadon
Wyddoch chi ddim, wir, mor anodd mae hi!

Mae cerflun yn wrthrych gaiff ei lunio er mwyn iddo fod yn rhywbeth pleserus a phryfoclyd i’r llygad, neu’n ysgogi’r synnwyr cyffwrdd. Mae’r lleoedd gwag negyddol sy’n cael eu creu oddi mewn ac o gwmpas y darn yr un mor bwysig.

Rwy’n gredwr cryf mai’r hyn a welwch yw’r hyn a gewch. Mae gonestrwydd a chyfanrwydd yn perthyn i’r gwaith o lusgo darn trwm o graig, hacio wrtho gyda gordd, cyn a gaing. Ar ôl llafur ac amser, caiff ei drawsffurfio, gydag offer a thechnegau cain, yn ddarn gorffenedig o gelfyddyd.

Treuliais gyfnod fel prentis mewn chwarel yng Ngogledd Swydd Efrog yn hytrach nag mewn ysgol gelf gan weithio fel saer maen yn ystod cyfnodau cynnar fy ngyrfa, yn dysgu sut i chwarela, torri a thrin cerrig. Yn dilyn damwain car ddifrifol pan oeddwn yn fy ugeiniau, llwyddais i osod trefn ar fy mywyd a phenderfynais ddefnyddio carreg fel cyfrwng creadigol.

Gallu rhyfeddol natur yw sylfaen fy nychymyg. Rhoi rhywbeth nôl i fywyd yw’r hyn sy’n fy sbarduno.

Yn ystod y ddwy flynedd ddiwethaf, rwyf wedi bod yn gweithio yn Carrara ar yr union graig a ddefnyddiwyd gan Michaelangelo. Mae gweithio ar farmor yn waith caled a chostus o ran amser. Yn sydyn, bu’n rhaid i fi addasu fy sgiliau traddodiadol ac o dipyn i beth rwyf wedi dysgu ambell un newydd. Dechreuais archwilio posibiliadau’r cyfrwng, gan ddatblygu troeon newydd yn fy arddull.

Mae bywyd artist yn cael ei adlewyrchu yn ei waith ef/ei gwaith hi. Mewn ffordd, mae’r arddangosfa hon o rai o’m cerfluniau yn adlewyrchiad o’m bywyd personol i – lleoedd gwag cadarnhaol a negyddol, dyddiau da a dyddiau gwael. Rwy’n gobeithio y byddwch yn eu hoffi.

Gwahoddiad i Artistiaid
Lluniau sy’n cael eu hystyried ar hyn o bryd ar gyfer ‘Llinellau a Haenau’

Amserau Agor yr Oriel
10yb - 8yh Dydd Llun - Dydd Sul

Arddangosfeydd y Gorffennol a'r Dyfodol | Arddangosfeydd Presennol | Polisi y Celfyddydau Gweledol | Gyfarwyddiadaus